ಪೀಠಿಕೆ: ಮಾನವ, ಕುಲ ದೇವತೆಗಳಿಂದ ರಕ್ಷಣೆ ಪಡೆಯುತ್ತಾ ಬಂದಿರುವಂತೆ ರಾಕ್ಷಸರಿಂದ ಉಪಟಳವನ್ನೂ ಪಡೆಯುತ್ತಾ ಬಂದಿದೆ. ಮಾನವನ ಜೀವನವನ್ನು ಆರಾಮದಾಯಕಗೊಳಿಸುವ ಸಂಶೋಧನೆಗಳನ್ನು ಮಾಡುವ ಶ್ರೇಷ್ಠ ವಿಜ್ಞಾನಿಗಳಿರುವಂತೆ ಮಾನವ ಕುಲಕ್ಕೆ ಹಾನಿ ಮಾಡುವ ದುಷ್ಟ ವಿಜ್ಞಾನಿಗಳೂ ಇದ್ದಾರೆ. ಅವರ ಒಂದು ತಳಿಯೇ ಸೈಬರ್ ಅಪರಾಧಿಗಳು.
ವಿವರಣೆ:
ಭಾರತವು ಇಂಟರ್ನೆಟ್ ಬಳಕೆದಾರರ ದೊಡ್ಡ ಮತ್ತು ಬೆಳೆಯುತ್ತಿರುವ ಜನಸಂಖ್ಯೆಯನ್ನು ಹೊಂದಿದೆ. 2025ರ ಅಂತ್ಯದ ಪೇಳೆಗೆ ಸಂಖ್ಯೆ 90 ಕೋಟಿ ಭಾರತೀಯರು ಇಂಟರ್ನೆಟ್ ಬಳಸಲಿದ್ದಾರೆ. ಭಾರತವು ವೇಗವಾಗಿ ವಿಸ್ತರಿಸುತ್ತಿರುವ ಡಿಜಿಟಲ್ ಆರ್ಥಿಕತೆಯನ್ನು ಹೊಂದಿದೆ. ಆರೋಗ್ಯ, ಶಿಕ್ಷಣ, ಹಣಕಾಸು, ಚಿಲ್ಲರೆ ವ್ಯಾಪಾರ ಮತ್ತು ಕೃಷಿಯಂತಹ ಕ್ಷೇತ್ರಗಳು ಆನ್‌ಲೈನ್ ಪ್ಲಾಟ್‌ಫಾರ್ಮ್‌ಗಳು ಮತ್ತು ಸೇವೆಗಳನ್ನು ಅವಲಂಬಿಸಿವೆ. ಈ ಹಿನ್ನೆಲೆಯಲ್ಲಿ ಸೈಬರ್ ದಾಳಿಗಳಿಗೆ ಹೆಚ್ಚಿನ ಅವಕಾಶಗಳನ್ನು ಒದಗಿಸುತ್ತದೆ.
ಸೈಬರ್ ದಾಳಿಯ ಕ್ಷೇತ್ರಗಳು:
ನಿರ್ಣಾಯಕ ಮೂಲ ಸೌಕರ್ಯಗಳು:
ಪವರ್ ಗ್ರಿಡ್ ಭಾಗಳು, ಸಾರಿಗೆ ವ್ಯವಸ್ಥೆಗಳು ಮತ್ತು ಸಂವಹನ ನೆಟ್‌ವರ್ಕ್ ಗಳಂತಹ ಭಾರತದ ನಿರ್ಣಾಯಕ ಮೂಲಸೌಕರ್ಯಗಳು ಸೈಬರ್ ದಾಳಿಗೆ ಗುರಿಯಾಗುತ್ತಿವೆ. ಅದು ಅಗತ್ಯ ಸೇವೆಗಳನ್ನು ಅಡ್ಡಿಪಡಿಸಬಹುದು ಮತ್ತು ಸಾರ್ವಜನಿಕ ಸುರಕ್ಷತೆ ಮತ್ತು ರಾಷ್ಟ್ರೀಯ ಭದ್ರತೆಗೆ ಅಪಾಯವನ್ನುಂಟು ಮಾಡಬಹುದು.
ಹಣಕಾಸು ವಲಯದ ಬೆದರಿಕೆಗಳು:
ಭಾರತದಲ್ಲಿನ ಹಣಕಾಸು ವಲಯವು ಸೈಬರ್ ಕ್ರಿಮಿನಲ್‌ಗಳಿಂದ ಹೆಚ್ಚಿನ ಅಪಾಯವನ್ನು ಎದುರಿಸುತ್ತಿದೆ. ಅವರು ಹಣವನ್ನು ಕದಿಯುವ ಅಥವಾ ಸುಲಿಗೆ ಮಾಡುವ ಮೂಲಕ ಲಾಭ ಪಡೆಯಲು ಪ್ರಯತ್ನಿಸುತ್ತಾರೆ. ಬ್ಯಾಂಕ್‌ಗಳು, ಹಣಕಾಸು ಸಂಸ್ಥೆಗಳು ಮತ್ತು ಆನ್‌ಲೈನ್ ಪಾವತಿ ವ್ಯವಸ್ಥೆಗಳ ಮೇಲಿನ ದಾಳಿಗಳು ಹಣಕಾಸಿನ ನಷ್ಟ ಗುರುತಿನ ಕಳ್ಳತನ ಮತ್ತು ಹಣಕಾಸು ವ್ಯವಸ್ಥೆಯಲ್ಲಿ ನಂಬಿಕೆಯ ನಷ್ಟವನ್ನು ಉಂಟುಮಾಡಬಹುದು.
ಸೈಬರ್ ಬೇಹುಗಾರಿಕೆ:
ಸೈಬರ್ ಬೇಹುಗಾರಿಕೆಯು ಇತರ ದೇಶಗಳು ಅಥವಾ ಘಟಕಗಳ ಹಿತಾಸಕ್ತಿಗಳ ಮೇಲೆ ಕಣ್ಣಿಡಲು ಅಥವಾ ಹಾಳು ಮಾಡಲು ಸೈಬರ್ ದಾಳಿಯ ಬಳಕೆಯಾಗಿದೆ. ಇತರ ದೇಶಗಳಂತೆ ಭಾರತವು ಗೌಪ್ಯ ಮಾಹಿತಿಯನ್ನು ಕದಿಯಲು ಸೈಬರ್ ಬೇಹುಗಾರಿಕೆ ಚಟುವಟಿಕೆಗಳಿಗೆ ಗುರಿಯಾಗಿದೆ. ಸೈಬರ್ ಬೇಹುಗಾರಿಕೆಯು ಭಾರತದ ರಾಷ್ಟ್ರೀಯ ಭದ್ರತೆ, ವಿದೇಶಾಂಗ ನೀಡಿ ಮತ್ತು ಆರ್ಥಿಕ ಅಭಿವೃದ್ಧಿಯ ಮೇಲೆ ಪರಿಣಾಮ ಬೀರಬಹುದು.
ಸುಧಾರಿತ ನಿರಂತರ ಬೆದರಿಕೆಗಳು (Advanced Persistent Threat-ಎಪಿಟಿ ಗಳು):
ಎಪಿಟಿಗಳು ಸಂಕೀರ್ಣ ಮತ್ತು ದೀರ್ಘಕಾಲದ ಸೈಬರ್ ದಾಳಿಗಳಾಗಿವೆ. ಸಾಮಾನ್ಯವಾಗಿ ಉತ್ತಮ ಸಂಪನ್ಮೂಲ ಮತ್ತು ನುರಿತ ಗುಂಪುಗಳಿಂದ ನಡೆಸಲ್ಪಡುತ್ತವೆ. ಈ ದಾಳಿಗಳನ್ನು ಗುರಿಯ ನೆಟ್‌ವರ್ಕ್ನಲ್ಲಿ ದೀರ್ಘಕಾಲ ನುಸುಳಲು ಮತ್ತು ಮರೆಮಾಡಲು ವಿನ್ಯಾಸಗೊಳಿಸಲಾಗಿರುತ್ತದೆ. ಇದು ಡೇಟಾವನ್ನು ಕದಿಯಲು ಅಥವಾ ಕುಶಲತೆಯಿಂದ ಹಾನಿಯನ್ನುಂಟುಮಾಡಲು ಅನುವು ಮಾಡಿಕೊಡುತ್ತದೆ.
ಪೂರೈಕೆ ಸರಪಳಿ ದೋಷಗಳು:
ಸರಬರಾಜು ಸರಪಳಿ ದೋಷಗಳು ತಮ್ಮ ಕಾರ್ಯಾಚರಣೆಗಳಿಗಾಗಿ ಸರಕಾರ ಮತ್ತು ವ್ಯವಹಾರ ಸಂಸ್ಥೆಗಳು ಬಳಸುವ ಸಾಫ್ಟ್‌ವೇರ್ ಅಥವಾ ಹಾರ್ಡ್ ವೇರ್ ಘಟಕಗಳಲ್ಲಿನ ದೌರ್ಬಲ್ಯಗಳನ್ನು ಉಲ್ಲೇಖಿಸುತ್ತವೆ.
ಭದ್ರತೆಗಾಗಿ ಕೈಗೊಂಡ ಉಪಕ್ರಮಗಳು:
ರಾಷ್ಟ್ರೀಯ ಸೈಬರ್ ಭದ್ರತಾ ನೀತಿ: ಈ ನೀತಿಯು ನಾಗರಿಕರು, ವ್ಯವಹಾರಗಳು ಮತ್ತು ಸರಕಾರಕ್ಕಾಗಿ ಸುರಕ್ಷಿತ ಮತ್ತು ಚೇತರಿಸಿಕೊಳ್ಳುವ ಸೈಬರ್‌ಸ್ಪೇಸ್ ಅನ್ನು ನಿರ್ಮಿಸುವ ಗುರಿ ಹೊಂದಿದೆ. ಇದು ಸೈಬರ್‌ಸ್ಪೇಸ್ ಮಾಹಿತಿ ಮತ್ತು ಮೂಲ ಸೌಕರ್ಯವನ್ನು ರಕ್ಷಿಸಲು ವಿವಿಧ ಉದ್ದೇಶಗಳು ಮತ್ತು ಕಾರ್ಯತಂತ್ರಗಳನ್ನು ವಿವರಿಸುತ್ತದೆ. ಸೈಬರ್ ದಾಳಿಗಳನ್ನು ತಡೆಯುವ ಮತ್ತು ಪ್ರತಿಕ್ರಿಯಿಸುವ ಸಾಮರ್ಥ್ಯಗಳನ್ನು ನಿರ್ಮಿಸುತ್ತದೆ.
ಸೈಬರ್ ಸುರಕ್ಷಿತ್ ಭಾರತ್ ಇನಿಶಿಯೇಟಿವ್:
ಸೈಬರ್ ಅಪರಾಧಗಳ ಬಗ್ಗೆ ಜಾಗೃತಿ ಮೂಡಿಸಲು ಮತ್ತು ಎಲ್ಲಾ ಸರಕಾರಿ ಇಲಾಖೆಗಳಾದ್ಯಂತ ಮುಖ್ಯ ಮಾಹಿತಿ ಭದ್ರತಾ ಅಧಿಕಾರಿಗಳು (ಸಿಐಎಸ್‌ಒ) ಮತ್ತು ಮುಂಚೂಣಿಯಲ್ಲಿರುವ ಐಟಿ ಸಿಬ್ಬಂದಿಗೆ ಸುರಕ್ಷತಾ ಕ್ರಮಗಳನ್ನು ರಚಿಸಲು ಈ ಉಪಕ್ರಮವನ್ನು ಪ್ರಾರಂಭಿಸಲಾಗಿದೆ.
ಭಾರತೀಯ ಸೈಬರ್ ಅಪರಾಧ ಸಮನ್ವಯ ಕೇಂದ್ರ (14C-Indian Cyber Crime Coordination Centre):
ಸೈಬರ್ ಅಪರಾಧಗಳನ್ನು ಸಮಗ್ರವಾಗಿ ಮತ್ತು ಸಂಘಟಿತ ರೀತಿಯಲ್ಲಿ ಎದುರಿಸಲು ಕಾನೂನು ಜಾರಿ ಸಂಸ್ಥೆಗಳಿಗೆ ಚೌಕಟ್ಟು ಮತ್ತು ಪರಿಸರ ವ್ಯವಸ್ಥೆಯನ್ನು ಒದಗಿಸಲು ಈ ಕೇಂದ್ರವನ್ನು ಸ್ಥಾಪಿಸಲಾಗಿದೆ. ಇದು ಏಳು ಘಟಕಗಳನ್ನು ಹೊಂದಿದೆ.
ಸೈಬರ್ ಸ್ವಚ್ಛತಾ ಕೇಂದ್ರ (ಬಾಟ್ನೆಟ್ ಕ್ಲೀನಿಂಗ್ ಮತ್ತು ಮಾಲ್ವೇರ್ ಅನಾಲಿಸಿಸ್‌ ಸೆಂಟರ್):
ಈ ಕೇಂದ್ರವನ್ನು 2017 ರಲ್ಲಿ ಭಾರತದಲ್ಲಿ ಬೋಟ್‌ನೆಟ್ ಸೋಂಕುಗಳನ್ನು ಪತ್ತೆಹಚ್ಚುವ ಮೂಲಕ ಸುರಕ್ಷಿತ ಸೈಬರ್ ಸ್ಪೇಸ್ ಅನ್ನು ರಚಿಸಲು ಪ್ರಾರಂಭಿ ಸಲಾಯಿತು ಮತ್ತು ಮತ್ತಷ್ಟು ಸೋಂಕುಗಳನ್ನು ತಡೆಗಟ್ಟಲು ಸುವ ಮತ್ತು ಅಂತಿಮ ಬಳಕೆದಾರರನ್ನು ಸ್ವಚ್ಛಗೊಳಿಸುವ ಸುರಕ್ಷಿತಗೊಳಿಸುವ ವ್ಯವಸ್ಥೆಯನ್ನು ಸಕ್ರಿಯಗೊಳಿಸುತ್ತದೆ.
ಕಂಪ್ಯೂಟರ್ ಎಮರ್ಜೆನ್ಸಿ ರೆಸ್ಪಾನ್ಸ್ ಟೀಮ್ - ಇಂಡಿಯಾ (ಸಿಇಆರ್‌ಟಿ-ಇನ್):
ಇದು ಸೈಬರ್ ಘಟನೆಗಳ ಬಗ್ಗೆ ಮಾಹಿತಿ ಯನ್ನು ಸಂಗ್ರಹಿಸುತ್ತದೆ, ವಿಶ್ಲೇಷಿಸುತ್ತದೆ ಮತ್ತು ಪ್ರಸಾರ ಮಾಡುತ್ತದೆ ಮತ್ತು ಸೈಬರ್ ಸುರಕ್ಷತೆ ಘಟನೆಗಳ ಬಗ್ಗೆ ಎಚ್ಚರಿಕೆಗಳನ್ನು ನೀಡುವ MeitY- Ministry of Electronics and Information Technologyನ ಸಂಸ್ಥೆಯಾಗಿದೆ.
ನಿರ್ಣಾಯಕ ಮಾಹಿತಿ ಮೂಲಸೌಕರ್ಯ (ಸಿಐಐ):
ಇದನ್ನು ಕಂಪ್ಯೂಟರ್ ಸಂಪನ್ಮೂಲ ಎಂದು ವ್ಯಾಖ್ಯಾನಿಸಲಾಗಿದೆ. ಅದರ ನಾಶವು ರಾಷ್ಟ್ರೀಯ ಭದ್ರತೆ, ಆರ್ಥಿಕತೆ, ಸಾರ್ವಜನಿಕ ಆರೋಗ್ಯ ಅಥವಾ ಸುರಕ್ಷತೆಯ ಮೇಲೆ ಕೆಟ್ಟ ಪರಿಣಾಮವನ್ನು ಬೀರುತ್ತದೆ.
ವಿದ್ಯುತ್, ಬ್ಯಾಂಕಿಂಗ್, ಟೆಲಿಕಾಂ, ಸಾರಿಗೆ, ಸರಕಾರ ಮತ್ತು ಕಾರ್ಯತಂತ್ರದ ಉದ್ಯಮಗಳಂತಹ ವಿವಿಧ ವಲಯಗಳ ಸಿಐಐ ಅನ್ನು ರಕ್ಷಿಸಲು ಸರಕಾರವು ರಾಷ್ಟ್ರೀಯ ನಿರ್ಣಾಯಕ ಮಾಹಿತಿ ಮೂಲಸೌಕರ್ಯ ಸಂರಕ್ಷಣಾ ಕೇಂದ್ರವನ್ನು (NCIIPC) ಸ್ಥಾಪಿಸಿದೆ.
ಡಿಫೆನ್ಸ್ ಸೈಬರ್ ಏಜೆನ್ಸಿ (DCyA):
DCyA ಭಾರತೀಯ ಸಶಸ್ತ್ರ ಪಡೆಗಳ ತ್ರಿ-ಸೇವಾ ಕಮಾಂಡ್ ಆಗಿದ್ದು ಅದು ಸೈಬರ್ ಭದ್ರತಾ ಬೆದರಿಕೆಗಳನ್ನು ನಿಭಾಯಿಸುವ ಜವಾಬ್ದಾರಿಯನ್ನು ಹೊಂದಿದೆ. ವಿವಿಧ ಸೈಬರ್ ಬೆದರಿಕೆ ಒಡ್ಡುವವರ ವಿರುದ್ಧ ಹ್ಯಾಕಿಂಗ್, ಕಣ್ಣಾವಲು, ಡೇಟಾ ಮರುಪಡೆಯುವಿಕೆ, ಎನ್‌ಕ್ರಿಪ್ಸನ್ ಮತ್ತು ಪ್ರತಿಕ್ರಮಗಳಂತಹ ಸೈಬರ್ ಕಾರ್ಯಾಚರಣೆಗಳನ್ನು ನಡೆಸುವ ಸಾಮರ್ಥ್ಯವನ್ನು ಇದು ಹೊಂದಿದೆ.
ಉಪಸಂಹಾರ:
ಬೆಳಕಿನೊಂದಿಗೆ ಕತ್ತಲೆಯೂ ಇರುವಂತೆ ಅನುಕೂಲಗಳ ಜೊತೆಗೆ ಅನನುಕೂಲಗಳೂ ಇರುತ್ತವೆ. ಸೈಬರ್ ಅಪರಾಧವು ಇಂದು ಜಗತ್ತನ್ನು ಕಾಡುವ ದೊಡ್ಡ ಸಮಸ್ಯೆಗಳಲ್ಲಿ ಒಂದಾಗಿದೆ. ಪ್ರತಿಬಂಧಕ ವೈಜ್ಞಾನಿಕ ಕ್ರಮಗಳು, ಅಪರಾಧಿಗಳಿಗೆ ಕಠಿಣ ಶಿಕ್ಷೆ ಮತ್ತು ಜನರಲ್ಲಿನ ಹೆಚ್ಚಿನ ಅರಿವು ಈ ಪಿಡುಗನ್ನು ನಿರ್ವಹಿಸಲು ಸೂಕ್ತ ಸಾಧನಗಳಾಗಿವೆ.
ಲೇಖಕರು:ಐ.ಜಿ. ಚೌಗಲಾ, ಸ್ಪರ್ಧಾತ್ಮಕ ಪರೀಕ್ಷಾ ಮಾರ್ಗದರ್ಶಕರು..
No comments:
Post a Comment